سكر بنات

ان نزلتك شوق
تعبني طلوعي
وان طلعتك شوق
نزلتي دموعي
يا اغرب .. اغرب من يحب
إنتي وحدك عارفه موعد خضوعي
فرقيني
وبسهوله فرقي بيني وبيني
واوعدك
ل انجمع لاجلك حبايب
من هدب قلبي لعيني
فرقيني
واوعدك
ل انتثر لاجلك هبايب
فرقينا
وانثرينا .. كلنا
انا وانا
واوعدك ماتعرفي
من انا فيهم
ومن فيهم .. انا
شرقيني
واتركي للشمس .. جلدي
لين تلعن
خامس الدنيا جلودي
ولين انسى
سادس اسامي جدودي
واتركي للرمل حفنه
من ترابي
لاجل اسميها حدودي
يمكن " اتريق" بماها
يمكن ادفى في سماها
ويمكن اتاضل .. واموت
واندفن
! لكن معاها
فسـّريني
كيف انا ميّت .. واسولف؟
وكيف انا
مشلول واوقف
وكيف انا اتنفس وانا اذكر
ان آخر شي فيني
كان
هو ذاك الرمـاد
وان آخر مالبسته
من ثيابي
كانت ثياب الحداد
كلها كانت
سواد .. في سواد
فسّريني
هو انا موتي غدا؟
كبوة جواد
إصبري
لاجل اعتذرلك
عن ثمان سنين مرت
من حياة
كنت اسميها حياتي
اصبري
لين أجمع لك .. رفاتي
إصبري ب اشوف امي
كيف تبكيني عليّ
إصبري ب اشوف دمّي
هو صحيح يصير ميّ؟
إصبري
إصبري : بقول شي
هو انا للحين حي ؟؟
صجّقي
مامت باقي
يمكن اللي مات موتي
يمكن ان حيّ .. عايش
وانتي فسرتي سكوتي
إن مافيني حياة
بعد هالموت المثالي
تسمحين اطل من عيني
على عينك واشوفك؟
تسمحين اشوف آخر من لمس جمرة كفوفك؟
تسمحين اعرف من قال لك
يا احلى البنات؟
قالت : أنت
واللي قبلك
قالها البارح
!! ومـــــــــــــات